Творчыя асобы, якія пацярпелі падчас пратэстаў, зняліся ў фотапраектце ART IS FREEDOM

«Адзін разумны чалавек калісь сказаў, «мастацтва — найлепшая метафара рэчаіснасці». Рэчаіснасць цяперашняй Беларусі — суцэльныя рамкі, абмежаванні і прыгнёт. І штодня мы адчуваем гэта ўсё вастрэй. Мы проста хочам казаць што думаем, спяваць, маляваць, пісаць, граць, танчыць. Жыць. Наш новы творчы праект, створаны супольна з Беларускім фондам культурнай салідарнасці #BY_culture, стаў увасабленнем не яркай мінуўшчыны, не касмічнай будучыні, а лакалізаванай цяпершчыны, дзе мастацтва мае маленькі шанц на самавыяўленне. Погляд мастака не заўсёды зразумелы, але ён мае права на ўвасабленне, і гэта немагчыма абмежаваць або спыніць».

У праекце ўзялі ўдзел:

F — Наталля Лубнеўская

Атрымала раненне ў нагу падчас асвятлення акцый пратэсту, дзе працавала акрэдытаваным рэпарцёрам. Правяла ў бальніцы 36 дзён, а рэдакцыя атрымала папярэджанне ад Дэпартамента дзяржаўнай інспекцыі працы за тое, што здарэнне не было прадухілена.

R — Алена Гіранок

Двойчы затрымана — першым разам за «няправільную» застаўку на тэлефоне, другім — за гэткі ж «няправільны» значок на адзенні. Вынік: двое сутак у ІЧУ і штраф 30 базавых.

EE — Валерыя Грыбусава і Уладзіслаў Пашкевіч

Іх кандыдатура была знята з конкурсу песні «Еўрабачанне-2021» з‑за няўгодлівай грамадзянскай пазіцыі і выказвання меркавання аб праблемах беларускай культуры. Выклікаліся ў РАУС за ўдзел у мітынгах.

D — Андрусь Такiданг

Атрымаў 15 сутак за дваровы канцэрт «Recha», так званы арышт быў зроблены прама ў таксi. Даўно маральна рыхтаваўся да затрымання, таму ўся гэтая сітуацыя выклікала своеасаблівую палёгку.

O — Леанід Паўлёнак

7.11.2020 года быў выкрадзены людзьмі ў чорным пасля дваровага вячэрняга канцэрта з гуртом «Recha» на Каменнай Горцы. Яму прысудзілі 15 сутак арышту за несанкцыянаваны ўдзел у незаконным мерапрыемстве.

M — Сямён Букін

У судовым пратаколе напісана: асуджаны за несанкцыянаванае шэсце ў сувязі з нязгодай з праведзенымі выбарамі прэзідэнта РБ. Насамрэч — затрыманы падчас мірнага шэсця, адбыў арышт у Жодзіне з жахлівымі ўмовамі, збіццём і здзекамі.

Аўтары прыекту:

Vladislav Popov

Mikhalchuk Tatyana

Ирина Чечет